1973 ರಲ್ಲಿ ಮೈಲಾರಪ್ಪ ಮೆಣಸಗಿಯವರು ಸ್ಥಾಪಿಸಿದ ”ವಿದ್ಯಾನಿಧಿ ಪ್ರಕಾಶನ”ವು 2002 ರಲ್ಲಿ ಬೆಳ್ಳಿ ಹಬ್ಬ ಆಚರಿಸಿ, ಕರ್ನಾಟಕದ ಪುಸ್ತಕದ ಉದ್ಯಮದಲ್ಲಿ ಅಭೂತಪೂರ್ವ ಕೊಡುಗೆಯನ್ನು ಸಲ್ಲಿಸುವಂತಾಯಿತು. ಒಂದೊಂದು ವಿಷಯದಲ್ಲಿ ಪರಿಣಿತರಾದ ಪ್ರತಿಭಾವಂತ ವಿದ್ವಾಂಸರನ್ನು ತಾವೇ ಭೇಟಿಯಾಗಿ ಅವರಿಗೆ ಗ್ರಂಥ ಬರೆಯಲು ಹುರಿದುಂಬಿಸಿ ಅವರಿಂದ ಗ್ರಂಥ ರಚನೆಯಾಗುವವರೆಗೂ ಪಟ್ಟು ಹಿಡಿದು ಬರೆಯಿಸಿದರು. ಅದರ ಫಲ ಇಂದು ರಾಜ್ಯದಾದ್ಯಂತ ಅನೇಕ ಲೇಖಕರು ತಯಾರಾಗಲು ಸಾಧ್ಯವಾಯಿತು. ”ವಿದ್ಯಾನಿಧಿ ಪ್ರಕಾಶನ” ಅದೊಂದು ಪ್ರತಿಭಾವಂತ ಲೇಖಕರು, ಉತ್ತಮ ಗ್ರಂಥಗಳನ್ನು ಸೃಷ್ಟಿಸುವ ಕಮ್ಮಟವೇ ಹೌದು. ಅದರ ಕರ್ತರಾಗಿ ಮುನ್ನಡೆಸಿದವರು ಮೆಣಸಗಿಯವರು. 2007ರಲ್ಲಿ ”ಸುವರ್ಣ ಕರ್ನಾಟಕ ರಾಜ್ಯ ಪ್ರಶಸ್ತಿ” ಯನ್ನು ನೀಡಿ ಪ್ರಕಾಶನದ ಹಿರಿಮೆಯನ್ನು ಹಾಗೂ ಪ್ರತಿಷ್ಠೆಯನ್ನು ಹೆಚ್ಚಿಸಿದ್ದಾರೆ. 2019ರಲ್ಲಿ ಕನ್ನಡ ಪುಸ್ತಕ ಪ್ರಾಧಿಕಾರ ಬೆಂಗಳೂರು ಇವರಿಂದ 2017ರ ”ಅತ್ಯುತ್ತಮ ಪ್ರಕಾಶನ ಪ್ರಶಸ್ತಿ” ಪುರಷ್ಕೃತವಾಗಿದೆ. ವಿದ್ಯಾನಿಧಿ ಪ್ರಕಾಶನವು ಕಳೆದ 51 ವರ್ಷಗಳಿಂದ ಸಾಹಿತ್ಯ ಮತ್ತು ಶೈಕ್ಷಣಿಕ ಸಾರಸ್ವತಾ ಲೋಕಕ್ಕೆ ತನ್ನ ಅಳಿಲು ಸೇವೆಯನ್ನು ಮಾಡುತ್ತಿದೆ.